اردوEnglish
اتوار, 22 نومبر 2026
  • Home  
  • پنجاب کے گرلز اسکولوں اور کالجوں میں غیر مجاز افراد کے داخلے پر پابندی
- تعلیم

پنجاب کے گرلز اسکولوں اور کالجوں میں غیر مجاز افراد کے داخلے پر پابندی

صوبائی وزیر تعلیم رانا سکندر حیات نے اعلان کیا ہے کہ پنجاب کے طالبات کے تعلیمی اداروں میں کسی کو بھی غیر مجاز داخلے کی اجازت نہیں ہوگی۔ انہوں نے خبردار کیا ہے کہ خلاف ورزی کرنے والوں کے خلاف سخت کارروائی کی جائے گی۔

اردو رپورٹ ڈیسک

پنجاب کے وزیر تعلیم رانا سکندر حیات نے صوبے کے گرلز اسکولوں اور کالجوں میں غیر مجاز افراد کے داخلے پر پابندی کا اعلان کرتے ہوئے خبردار کیا ہے کہ آئندہ کسی کو بھی طالبات کے تعلیمی اداروں میں داخل ہونے کی اجازت نہیں دی جائے گی۔

سماجی رابطے کی ویب سائٹ ایکس پر ہفتے کی شب اپنے پیغام میں صوبائی وزیر تعلیم نے کہا کہ طالبات ہماری بیٹیاں ہیں اور ان کے تحفظ، عزت اور تقدس کی حفاظت ہماری ذمہ داری ہے۔ اگر کسی نے اس پابندی کی خلاف ورزی کی تو اسے سخت کارروائی کا سامنا کرنا پڑے گا۔

سرکاری اسکول میں مبینہ غیر مجاز داخلے کی ویڈیو پر ردعمل

رانا سکندر حیات کا یہ بیان ہفتے کے روز ایک صارف کی جانب سے سماجی رابطے کی ویب سائٹ ایکس پر ایک ویڈیو شیئر کیے جانے کے بعد سامنے آیا۔

ویڈیو شیئر کرنے والے صارف نے دعویٰ کیا تھا کہ سما ٹی وی کا ایک اینکر مائیکروفون لے کر سرکاری اسکول کے بچوں اور خواتین کے لیے مخصوص حصے میں زبردستی داخل ہوا۔

صارف نے سوال اٹھایا تھا کہ کیا سرکاری اسکولوں میں زیر تعلیم بچوں اور خواتین کی نجی زندگی اور رازداری کا کوئی تحفظ نہیں؟ اس پوسٹ میں صوبائی وزیر تعلیم کو بھی مخاطب کیا گیا تھا۔

تاہم ویڈیو میں دکھائے گئے اسکول کا نام اور مقام ظاہر نہیں کیا گیا۔

تاحال کوئی باضابطہ نوٹیفکیشن جاری نہیں ہوا

رپورٹ کے مطابق صوبائی وزیر تعلیم کے اعلان کے باوجود خبر کی اشاعت تک اس پابندی کے حوالے سے کوئی باضابطہ سرکاری نوٹیفکیشن سامنے نہیں آیا تھا۔

طالبات کے تحفظ کے لیے ماضی کے اقدامات

پنجاب حکومت اس سے قبل بھی طالبات کے تحفظ کے لیے اسی نوعیت کے اقدامات کرچکی ہے۔

2024 میں صوبے میں خواتین کے ہاسٹلز، اسکولوں اور کالجوں میں صرف خواتین عملے کی تعیناتی کا فیصلہ کیا گیا تھا۔

اسی طرح گزشتہ سال بھی مبینہ طور پر گرلز ہائی اور ہائر سیکنڈری اسکولوں میں مرد اساتذہ کے داخلے پر پابندی عائد کی گئی تھی۔

urdureport.com@2025. All Rights Reserved

Your license hasn’t been activated yet. Activate it now!