اردو رپورٹ ڈیسک
سعودی عرب نے سیاحت کے فروغ اور غیر ملکی شہریوں کے لیے سفری سہولتوں میں اضافے کے لیے اپنے سیاحتی ویزا پروگرام میں مزید چار ممالک کو شامل کر لیا ہے۔
سعودی وزارتِ خارجہ کے مطابق نئے شامل کیے گئے ممالک میں میکسیکو، شمالی مقدونیا، بوسنیا و ہرزیگووینا اور سربیا شامل ہیں۔ ان ممالک کے شہری اب سیاحتی ویزا آن لائن حاصل کرنے کے علاوہ سعودی عرب پہنچنے پر سرحدی گزرگاہوں سے بھی ویزا حاصل کر سکیں گے۔
سیاحتی ویزے پر عمرے کی سہولت بھی دستیاب
سعودی سیاحتی ویزا صرف تفریحی سفر تک محدود نہیں بلکہ اس کے ذریعے مختلف دیگر مقاصد کے لیے بھی مملکت کا سفر کیا جا سکتا ہے۔
اس ویزے پر آنے والے غیر ملکی شہری تقریبات میں شرکت، نمائشوں اور کانفرنسوں میں شمولیت کے علاوہ اپنے دوستوں اور رشتے داروں سے ملاقات بھی کر سکتے ہیں۔
سیاحتی ویزے کے حامل افراد کو عمرے کی ادائیگی کی اجازت بھی حاصل ہے، تاہم انہیں سعودی عرب میں نافذ قوانین اور متعلقہ ہدایات پر عمل کرنا ہوگا۔
سیاحتی ویزوں کی تعداد ایک کروڑ 80 لاکھ تک پہنچ گئی
سعودی وزارتِ خارجہ کے اعداد و شمار کے مطابق 2023 سے اب تک غیر ملکی سیاحوں کے لیے تقریباً ایک کروڑ 80 لاکھ سیاحتی ویزے جاری کیے جا چکے ہیں۔
وزارت کے مطابق سعودی عرب تقریباً 65 ممالک کے شہریوں کے لیے ویزا درخواست دینے کا عمل ڈیجیٹل بنا چکا ہے، جس کے تحت اہل مسافر آن لائن درخواست جمع کرا کے ویزا حاصل کر سکتے ہیں۔
بین الاقوامی سیاحت کے فروغ کی کوششیں
سعودی عرب کی جانب سے سیاحتی ویزا پروگرام میں مزید ممالک کی شمولیت کو بین الاقوامی سیاحت کے فروغ اور غیر ملکی سیاحوں کے لیے سفری سہولتیں بڑھانے کی پالیسی کا حصہ قرار دیا جا رہا ہے۔


