اردو رپورٹ ڈیسک
عالمی صورتحال میں بگاڑ اور پٹرول کی قیمت 400 روپے فی لیٹر کے قریب پہنچنے کے پیش نظر وفاقی حکومت نے ملک میں پٹرول کی کھپت کم کرنے کے لیے ہنگامی اقدامات پر غور شروع کر دیا ہے۔
ذرائع کے مطابق امریکا اور ایران کے جاری تنازع کے باعث عالمی سطح پر پیدا ہونے والے توانائی کے دباؤ سے نمٹنے اور ملک میں پٹرولیم مصنوعات کی بلاتعطل فراہمی یقینی بنانے کے لیے حکومت مختلف تجاویز کا جائزہ لے رہی ہے۔
اسمارٹ پٹرولیم لاک ڈاؤن کی تجویز
ذرائع نے بتایا کہ حکومت ’’اسمارٹ پٹرولیم لاک ڈاؤن‘‘ کے نام سے ایک تجویز پر غور کر رہی ہے، جس کے تحت شہریوں کو ہفتے میں تین دن چھٹی دی جا سکتی ہے، جبکہ کاروباری اور سرکاری سرگرمیاں چار دن جاری رہیں گی۔
مجوزہ منصوبے کے تحت جمعہ، ہفتہ اور اتوار کو نقل و حرکت محدود رکھنے کے دن قرار دینے کی تجویز ہے۔ اس اقدام کا مقصد غیرضروری سفر میں کمی لانا، پٹرول کی بچت کرنا اور ملک بھر میں ایندھن کی کھپت کم کرنا ہے۔
کاروباری اور سرکاری سرگرمیاں جاری رہیں گی
مجوزہ منصوبے کے مطابق کاروباری اداروں اور سرکاری دفاتر کی معمول کی سرگرمیاں ہفتے میں چار دن جاری رہیں گی۔ حکومت کا مقصد ہفتے کے اختتام پر غیرضروری نقل و حرکت کو محدود کرکے پٹرولیم مصنوعات کی طلب کم کرنا ہے۔
ذرائع کے مطابق حکام ممکنہ توانائی بحران سے نمٹنے کے لیے اسمارٹ لاک ڈاؤن کی حکمت عملی پر مشاورت کر رہے ہیں۔ یہ بحران عالمی حالات میں تبدیلی کے باعث پیدا ہونے والے توانائی کے دباؤ سے منسلک ہو سکتا ہے۔
حکومت مجوزہ منصوبے کے عوامی سرگرمیوں، کاروباری اداروں اور سرکاری امور پر ممکنہ اثرات کا بھی جائزہ لے رہی ہے۔ تاہم، اس تجویز پر حتمی فیصلہ تاحال نہیں کیا گیا۔
