اسلام آباد: رحمت للعالمین و خاتم النبیین اتھارٹی کے کے چیئرمین خورشید ندیم نے کہا ہے کہ عوام ملک دشمن عناصر کی سازشوں سے ہوشیار رہیں۔
انہوں نے کہا کہ دہشت گردی کی ہر شکل اسلامی تعلیمات اور رسول رحمت کے اصولوں کے خلاف ہے،انہوں نے بلوچستان میں حالیہ دہشت گرد حملوں کی سخت ترین الفاظ میں مذمت کرتے ہوئے کہا ہے کہ پاکستان کی خودمختاری، سلامتی اور استحکام پر کسی قسم کا سمجھوتہ ممکن نہیں۔
ایک بیان میں خورشید ندیم نے شہدا کے اہل خانہ سے دلی تعزیت اور ہمدردی کا اظہار کرتے ہوئے کہا کہ دہشت گردی نہ صرف پاکستان بلکہ پورے خطے کے امن و استحکام کے لیے ایک سنگین خطرہ ہے۔ انہوں نے کہا کہ دہشت گرد عناصر ملک کو عدم استحکام سے دوچار کرنے کی ناکام کوشش کر رہے ہیں، تاہم قوم اور ریاستی ادارے متحد ہو کر ان عزائم کو ناکام بنا رہے ہیں۔
چیئرمین نے دہشت گردی کے خلاف پاک فوج اور سیکیورٹی اداروں کی بروقت اور مؤثر کارروائیوں کو سراہتے ہوئے کہا کہ افواجِ پاکستان نے ہمیشہ ملک کے دفاع اور عوام کے تحفظ میں کلیدی کردار ادا کیا ہے۔
یہ بھی پڑھئِے
بلوچستان ، مختلف شہروں میں فتنہ الہندوستان کے حملے ناکام ، صوبے میں داخلی راستے بند – urdureport.com
145 دہشت گردوں کی لاشیں ہمارے پاس موجود ہیں: وزیراعلیٰ بلوچستان – urdureport.com
انہوں نے بیرونی مداخلت کا حوالہ دیتے ہوئے کہا کہ دشمن قوتیں بلوچستان میں بدامنی پھیلانے کے لیے مختلف سازشوں میں مصروف ہیں، مگر یہ کوششیں کبھی کامیاب نہیں ہوں گی۔ چیئرمین نے بلوچستان کے غیور عوام سے اپیل کی کہ وہ دشمن کے ناپاک عزائم کو سمجھیں، ہوشیار رہیں اور ملک دشمن عناصر کے آلہ کار نہ بنیں۔
