لاہور کے قذافی اسٹیڈیم میں کھیلے گئے پاکستان سپر لیگ (پی ایس ایل) سیزن 11 کے فائنل میں پشاور زلمی نے شاندار کارکردگی کا مظاہرہ کرتے ہوئے حیدرآباد کنگز مین کو 5 وکٹوں سے شکست دے کر دوسری مرتبہ ٹائٹل اپنے نام کر لیا۔ اس سے قبل پشاور زلمی نے 2017 میں بھی پی ایس ایل ٹرافی جیتی تھی۔
فائنل میں پہلے بیٹنگ کرتے ہوئے حیدرآباد کنگز مین کی پوری ٹیم 18 اوورز میں 129 رنز بنا کر آؤٹ ہوگئی۔ جواب میں پشاور زلمی نے 130 رنز کا ہدف 15.2 اوورز میں 5 وکٹوں کے نقصان پر حاصل کر لیا۔
پشاور زلمی کی کامیابی میں Aaron Hardie نے آل راؤنڈ کارکردگی دکھاتے ہوئے 56 رنز اسکور کیے جبکہ عبدالصمد نے 48 رنز کی اہم اننگز کھیلی۔ کپتان بابر اعظم صفر پر آؤٹ ہوگئے جبکہ محمد حارث 6 اور Kusal Mendis 9 رنز بنا سکے۔ حیدرآباد کنگز مین کے بولر محمد علی نے 3 کھلاڑیوں کو آؤٹ کیا۔
حیدرآباد کنگز مین کی جانب سے کپتان Marnus Labuschagne نے 20 رنز کی مزاحمتی اننگز کھیلی جبکہ اوپنر صائم ایوب 54 رنز بنا کر نمایاں رہے، تاہم انہیں دوسرے اینڈ سے خاطر خواہ سپورٹ نہ مل سکی۔
پشاور زلمی کی بولنگ میں ایرون ہارڈی نے تباہ کن اسپیل کرتے ہوئے 4 اہم وکٹیں حاصل کیں۔ Nahid Rana نے 2 جبکہ سفیان مقیم اور محمد باسط نے بالترتیب ایک اور دو وکٹیں حاصل کیں۔
رنگا رنگ تقریب
میچ سے قبل رنگا رنگ اختتامی تقریب منعقد ہوئی جس میں معروف فنکاروں نے اپنے فن کا مظاہرہ کیا۔ تقریب میں شہباز شریف، محسن نقوی اور دیگر وفاقی وزراء نے شرکت کی۔
اس موقع پر وزیراعظم شہباز شریف نے دونوں ٹیموں کے کھلاڑیوں سے ملاقات کی، ان کی کارکردگی کو سراہا اور فائنل تک رسائی پر مبارکباد دی۔ پاکستان کرکٹ بورڈ نے اعلان کیا کہ فائنل کے تمام ٹکٹس فروخت ہوچکے تھے اور اسٹیڈیم مکمل طور پر شائقین سے بھرا ہوا تھا۔
مزید پڑھئیں
