اردو رپورٹ ڈیسک
راولپنڈی میں امن و امان کی صورتحال کو مؤثر انداز میں برقرار رکھنے کے لیے وفاقی حکومت نے پاک فوج کی تین کمپنیوں کو 6 ماہ کے لیے تعینات کرنے کی منظوری دے دی ہے۔
ذرائع کے مطابق فوج کی تعیناتی آئین کے آرٹیکل 245 کے تحت کی گئی ہے، جبکہ اس کا مقصد سول انتظامیہ کو امن و امان برقرار رکھنے میں معاونت فراہم کرنا ہے۔
محکمہ داخلہ کی درخواست
فوج کی تعیناتی محکمہ داخلہ پنجاب کی درخواست پر منظور کی گئی۔ اس دوران پاک فوج ضلعی انتظامیہ کے ساتھ مل کر حساس مقامات اور اہم شاہراہوں کی سکیورٹی سمیت امن و امان سے متعلق امور میں معاونت کرے گی۔
جاری کیے گئے نوٹیفکیشن کے مطابق فوج کی تعیناتی کی مدت 6 ماہ مقرر کی گئی ہے۔
راولپنڈی میں سیکیورٹی
حکام کے مطابق اس اقدام کا مقصد راولپنڈی میں سکیورٹی انتظامات کو مزید مؤثر بنانا اور کسی بھی ممکنہ صورتحال سے نمٹنے کے لیے سول انتظامیہ کو اضافی معاونت فراہم کرنا ہے۔
آئین کے آرٹیکل 245 کے تحت مسلح افواج کو سول انتظامیہ کی معاونت کے لیے طلب کیا جا سکتا ہے۔
