اردو رپورٹ ڈیسک
محکمہ موسمیات نے ملک کے بالائی علاقوں میں مون سون ہواؤں کے داخل ہونے کی پیشگوئی کی ہے، جس کے باعث پنجاب اور دیگر بالائی علاقوں میں آج سے 17 ستمبر تک بارش کا امکان ہے۔
نیشنل ڈیزاسٹر مینجمنٹ اتھارٹی (این ڈی ایم اے) نے مون سون کے نویں اور آخری اسپیل کے حوالے سے الرٹ جاری کیا ہے۔ موسمی صورتحال کے باعث اسلام آباد، راولپنڈی، پشاور، فیصل آباد اور لاہور میں شہری سیلاب کا خدشہ ظاہر کیا گیا ہے۔
بالائی علاقوں میں لینڈ سلائیڈنگ کا خطرہ
این ڈی ایم اے نے موسمی صورتحال کے دوران بالائی علاقوں، کشمیر، مری اور گلیات میں لینڈ سلائیڈنگ کے خطرے سے بھی خبردار کیا ہے۔
اسلام آباد میں تیز ہواؤں سے درخت اور اسٹیج گر گیا
وفاقی دارالحکومت اسلام آباد میں رات گئے طوفانی صورتحال پیدا ہوئی، جہاں تیز ہواؤں کے باعث مارگلہ روڈ، فیصل ایونیو سمیت مختلف مقامات پر درخت گر گئے۔
درخت گرنے سے بعض مقامات پر گاڑیوں کو بھی نقصان پہنچا، جبکہ اسپورٹس کمپلیکس میں کنسرٹ کا اسٹیج بھی تیز ہواؤں کے باعث گر گیا۔
پشاور اور اسلام آباد میں بارش
پشاور اور گردونواح میں بھی بارش ہوئی، جبکہ اسلام آباد میں صبح سویرے بادل چھا گئے اور موسمی صورتحال برقرار رہی۔
این ڈی ایم اے نے شہریوں اور مسافروں کو موسمی پیشگوئی کے دوران محتاط رہنے اور غیر ضروری سفر سے گریز کرنے کی ہدایت کی ہے۔
