کراچی میں مبینہ منشیات فروش انمول عرف پنکی کے خلاف جاری تحقیقات میں نئی تفصیلات سامنے آگئی ہیں۔ پولیس نے عدالت میں جمع کرائی گئی رپورٹ میں دعویٰ کیا ہے کہ ملزمہ کے قبضے سے بڑی مقدار میں کوکین، کیمیکل مواد اور منشیات تیار کرنے والا سامان برآمد کیا گیا۔
پولیس رپورٹ کے مطابق انمول عرف پنکی سے 1540 گرام کوکین، 5240 گرام بیکنگ پاؤڈر، 930 گرام ایفی ڈرین ہائیڈرو کلورائیڈ، 500 گرام کیٹامین ہائیڈرو کلورائیڈ اور 330 گرام کوکین مکس ہائیڈرو کلورائیڈ برآمد ہوئی۔ اس کے علاوہ ایک بیگ بھی تحویل میں لیا گیا جس میں 1050 گرام ایکٹون موجود تھا۔ حکام کے مطابق تقریباً 6970 گرام ایسا خام مواد بھی ملا ہے جو مبینہ طور پر کوکین تیار کرنے کے لیے استعمال ہوتا تھا۔
تحقیقات میں انکشافات
تحقیقاتی اداروں کا کہنا ہے کہ برآمد شدہ منشیات کا کیمیکل ٹیسٹ کروایا جا رہا ہے، جبکہ مکمل رپورٹ عدالت میں پیش کی جائے گی۔ تمام سامان کو مقدمے کے ریکارڈ کا حصہ بنا دیا گیا ہے۔
پولیس کے مطابق ملزمہ کا نیٹ ورک کراچی کے پوش علاقوں، نجی اسکولوں اور کالجوں تک پھیلا ہوا تھا۔ رپورٹ میں دعویٰ کیا گیا ہے کہ کم عمر طلبہ کو منشیات فروخت کی جاتی تھیں اور زیادہ خریداری کرنے والوں کو خصوصی رعایتی پیکجز بھی دیے جاتے تھے۔
حکام کا کہنا ہے کہ تعلیمی اداروں میں موجود سہولت کاروں کی شناخت اور نیٹ ورک کے دیگر ارکان تک پہنچنے کے لیے مزید تحقیقات جاری ہیں۔ عدالت نے پولیس کی رپورٹ کو سرکاری عدالتی ریکارڈ کا حصہ بنا لیا ہے۔
دوسری جانب ایڈیشنل آئی جی Azad Khan نے سندھ ہائیکورٹ میں صحافیوں سے گفتگو کرتے ہوئے اعتراف کیا کہ پراسیکیوشن کے نظام میں بعض کمزوریاں موجود ہیں، تاہم انہیں دور کرنے کی کوشش کی جا رہی ہے۔ ان کا کہنا تھا کہ پولیس نے کیس کی تفتیش میں کسی قسم کی غفلت نہیں برتی اور اصل حقائق عدالت میں واضح ہوں گے۔
نیٹ ورک میں شامل افراد
تفتیش کے دوران انمول عرف پنکی کے اہلخانہ کے بارے میں بھی اہم انکشافات سامنے آئے ہیں۔ پولیس ریکارڈ کے مطابق اس کے تین بھائی، ریاض بلوچ، محمد ناصر اور شوکت بخش، مبینہ طور پر منشیات فروشی کے مقدمات میں ملوث رہے ہیں۔ حکام کے مطابق ان افراد کے خلاف مختلف تھانوں میں اسلحہ آرڈیننس اور نارکوٹکس ایکٹ کے تحت مقدمات درج ہیں۔جبکہ ملزمہ کے بعض بااثر افراد اور مقامی سیاسی رہنماوں کے ساتھ رابطوں کا بھِ انکشاف ہوا ہے۔
مذید پڑھئِے
انمول پنکی کی کہانی جس کے گاہک امیر نوجوان لڑکے لڑکیاں ہیں – urdureport.com
انمول پنکی کی بغیر ہتھکڑی پیشی کا سخت نوٹس،جوڈیشل ریمانڈ پر – urdureport.com
پولیس ذرائع کا دعویٰ ہے کہ انمول عرف پنکی کے روابط بیرونِ ملک موجود منشیات کارٹلز سے بھی جڑے ہوئے تھے۔ ذرائع کے مطابق وہ مبینہ طور پر ’جینگل‘ نامی منشیات درآمد کر کے فروخت کرتی تھی، جبکہ اس کی تیار کردہ کوکین کے خریداروں کی تعداد بھی زیادہ تھی۔
ادھر ایک الگ انکوائری میں اس معاملے کا جائزہ لیا جا رہا ہے کہ ملزمہ کو عدالت میں پیش کرنے کے دوران کہیں ضابطوں کی خلاف ورزی تو نہیں ہوئی۔ پولیس حکام کے مطابق متعدد افسران اور اہلکاروں کے بیانات ریکارڈ کیے جا چکے ہیں جبکہ تحقیقات کا سلسلہ جاری ہے۔
