بالی وڈ سپر سٹار دپیکا پڈوکون نے ایک اور بین الاقوامی اعزاز اپنے نام کر لیا ہے۔ انہیں 2026 کی ہالی وڈ واک آف فیم کی فہرست میں شامل کیا گیا ہے، جس کے ساتھ ہی وہ یہ اعزاز حاصل کرنے والی پہلی بھارتی اداکارہ بن گئی ہیں۔
ہالی وڈ چیمبر آف کامرس کی جانب سے جاری کردہ فہرست میں فلم، ٹیلی ویژن، موسیقی، لائیو تھیٹر اور سپورٹس انٹرٹینمنٹ سمیت مختلف شعبوں سے تعلق رکھنے والی 35 نمایاں شخصیات کو واک آف فیم کے لیے منتخب کیا گیا ہے۔
دپیکا پڈوکون Deepika Padukone کو موشن پکچرز کی کیٹیگری میں منتخب کیا گیا، جہاں ان کے ساتھ ایمیلی بلنٹ، ٹموتھی شیلامے، ڈیمی مور، میریون کوتیار اور فلم ساز کرس کولمبس سمیت دیگر معروف شخصیات بھی شامل ہیں۔
کون کون منتخب ہوئے ؟
اس سال ہالی وڈ واک آف فیم Hollywood Walk of Fameکے لیے منتخب ہونے والی دیگر نمایاں شخصیات میں گلوکارہ ملی سائرس، گلوکار جاش گروبن، اداکارہ سارہ مشیل گیلر، این بی اے لیجنڈ شکیل او نیل اور معروف شیف گورڈن ریمزی بھی شامل ہیں۔
واک آف فیم سلیکشن کمیٹی کے چیئرمین پیٹر روتھ نے کہا کہ منتخب ہونے والی تمام شخصیات نے اپنی اپنی فیلڈ میں غیر معمولی خدمات انجام دی ہیں اور انہیں اس تاریخی اعزاز سے نوازنا باعثِ فخر ہے۔
ہالی وڈ چیمبر آف کامرس نے بھی سوشل میڈیا پر دپیکا سمیت تمام منتخب شخصیات کو مبارک باد دیتے ہوئے انہیں 2026 کی واک آف فیم کلاس میں خوش آمدید کہا۔
ستارے کب لگیں گے؟
اگرچہ ستارہ نصب کرنے کی تقریب کی تاریخوں کا اعلان ابھی نہیں کیا گیا، تاہم قواعد کے مطابق منتخب شخصیات کو دو سال کے اندر اپنی تقریب منعقد کرنی ہوتی ہے، ورنہ یہ اعزاز منسوخ بھی ہو سکتا ہے۔
دپیکا پڈوکون نے اپنے فلمی سفر کا آغاز 2006 میں کنڑ فلم ایشوریا سے کیا، جبکہ 2007 میں شاہ رخ خان کے ساتھ فلم اوم شانتی اوم نے انہیں راتوں رات شہرت کی بلندیوں تک پہنچا دیا۔ اس فلم کی کامیابی پر انہیں فلم فیئر کا بہترین نئی اداکارہ کا ایوارڈ بھی ملا۔
بعد ازاں انہوں نے چنئی ایکسپریس، پیکو، گولیوں کی راس لیلا رام لیلا، باجی راؤ مستانی اور دیگر کامیاب فلموں کے ذریعے بالی وڈ کی صفِ اول کی اداکاراؤں میں اپنی جگہ مضبوط کی۔
دپیکا نے 2017 میں ون ڈیزل کے ساتھ ہالی وڈ فلم xXx: Return of Xander Cage کے ذریعے بین الاقوامی فلمی دنیا میں قدم رکھا، جہاں ان کی اداکاری کو بھی سراہا گیا۔
دیپکا کی اگاہی مہم
اداکاری کے علاوہ دپیکا ذہنی صحت سے متعلق آگاہی مہم میں بھی سرگرم کردار ادا کرتی رہی ہیں۔ گزشتہ برس انہوں نے ایک بھارتی صنعت کار کے ہفتے میں 90 گھنٹے کام کرنے کے بیان پر ردعمل دیتے ہوئے کہا تھا کہ کامیابی کے ساتھ ساتھ ذہنی صحت اور ذاتی زندگی کا توازن بھی بے حد ضروری ہے، اور اسی تناظر میں انہوں نے #MentalHealthMatters کا پیغام بھی شیئر کیا تھا۔
دپیکا اور ان کے شوہر رنویر سنگھ 2024 میں ایک بیٹی کے والدین بنے، جس کا نام دعا رکھا گیا۔ اس نام پر سوشل میڈیا پر مختلف آرا سامنے آئیں، تاہم متعدد صارفین نے اس تنقید کو غیر ضروری قرار دیتے ہوئے جوڑے کی حمایت بھی کی۔
مذید پڑھئِں
