اردو رپورٹ ڈیسک
پاکستان ٹیلی کمیونیکیشن اتھارٹی (پی ٹی اے) نے ٹیلی کام صارفین کی شکایات کے بروقت ازالے کے لیے اپنے کمپلینٹ مینجمنٹ سسٹم کو اپ گریڈ کردیا ہے۔
پی ٹی اے نے اپ گریڈ شدہ کمپلینٹ مینجمنٹ سسٹم کے لیے موبائل ایپ بھی متعارف کرادی ہے، جس میں سکیورٹی بہتر بنانے کے لیے او ٹی پی پر مبنی ملٹی فیکٹر توثیق کا نظام شامل کیا گیا ہے۔
اتھارٹی کے مطابق نئی موبائل ایپ آئی او ایس اور اینڈرائیڈ دونوں صارفین کے لیے دستیاب ہوگی اور اسے صارفین کے لیے زیادہ محفوظ اور آسان بنایا گیا ہے۔
صارفین اب موبائل ایپ کے ذریعے اپنی شکایات درج کرنے کے ساتھ ساتھ ان کی پیش رفت بھی باآسانی دیکھ سکیں گے۔
شکایات کی جانچ اور دستاویزات اپ لوڈ کرنے کا بہتر نظام
نئی ایپ میں شکایات کی جانچ پڑتال اور متعلقہ دستاویزات اپ لوڈ کرنے کے نظام کو بھی بہتر بنایا گیا ہے۔
پی ٹی اے کے مطابق ان اصلاحات کا مقصد صارفین کے لیے شکایات کے ازالے کے عمل کو مزید آسان بنانا ہے۔
موبائل نمبرز سے متعلق مشتبہ فراڈ کی رپورٹنگ کے لیے نیا ماڈیول
پی ٹی اے نے موبائل نمبرز سے متعلق مشتبہ فراڈ کی اطلاع دینے کے لیے ایپ میں نیا ماڈیول بھی شامل کیا ہے۔
اس ماڈیول کے ذریعے صارفین موبائل نمبرز سے متعلق مشتبہ فراڈ کی سرگرمیوں کی رپورٹ کرسکیں گے۔
