اسلام آباد: پاکستان میں اسٹاک مارکیٹ میں سرمایہ کاری کرنے کے خواہشمند افراد کے لیے اکاؤنٹ کھولنے کا عمل مزید آسان بنانے کے لیے سیکیورٹیز اینڈ ایکسچینج کمیشن آف پاکستان (ایس ای سی پی) نے نیا ڈیجیٹل آن بورڈنگ فریم ورک متعارف کرا دیا ہے۔
نئے نظام کے تحت سرمایہ کار گھر بیٹھے ڈیجیٹل طریقے سے اسٹاک مارکیٹ میں اکاؤنٹ کھولنے کی درخواست دے سکیں گے۔ سہولت اکاؤنٹ کی درخواست پر ایک دن کے اندر کارروائی مکمل کرنے کی سہولت فراہم کی گئی ہے، جبکہ انویسٹر اکاؤنٹ کی درخواست پر زیادہ سے زیادہ دو دن میں فیصلہ کیا جائے گا۔
ایس ای سی پی کے مطابق نئے فریم ورک کا مقصد سرمایہ کاری کے عمل کو تیز، شفاف اور صارف دوست بنانا ہے تاکہ زیادہ سے زیادہ افراد کو کیپٹل مارکیٹ تک رسائی حاصل ہوسکے۔
درخواست کی آن لائن نگرانی کی سہولت
نئے ڈیجیٹل نظام میں سرمایہ کاروں کے لیے درخواست کی پیش رفت جاننے کی سہولت بھی شامل کی گئی ہے۔ درخواست جمع کرانے کے بعد فراہم کردہ ٹریکنگ آئی ڈی کے ذریعے صارف کسی بھی وقت اپنی درخواست کا اسٹیٹس معلوم کرسکے گا۔
اگر کسی سرمایہ کار کی اکاؤنٹ کھولنے کی درخواست مسترد کی جاتی ہے تو متعلقہ بروکر کو مسترد کیے جانے کی وجوہات تحریری طور پر فراہم کرنا ہوں گی، جس سے عمل میں شفافیت بہتر ہونے کی توقع ہے۔
دوبارہ تصدیق سے بھی استثنیٰ
فریم ورک کے مطابق ایسے سرمایہ کار جن کی شناخت پہلے ہی تصدیق شدہ ہے، انہیں دوبارہ مکمل تصدیقی عمل سے گزرنے کی ضرورت نہیں ہوگی۔ اس اقدام سے اکاؤنٹ کھولنے کے عمل میں وقت کی بچت ہوگی اور غیر ضروری مراحل کم ہوں گے۔
نئے نظام کے تحت ڈیجیٹل آن بورڈنگ اور درخواستوں کی پراسیسنگ چوبیس گھنٹے، ہفتے کے ساتوں دن جاری رکھنے کی سہولت بھی فراہم کی گئی ہے۔
سرمایہ کاروں کی تعداد 25 لاکھ تک بڑھانے کا ہدف
ایس ای سی پی کا کہنا ہے کہ ڈیجیٹل آن بورڈنگ کے ذریعے ملک میں اسٹاک مارکیٹ کے سرمایہ کاروں کی تعداد بڑھانے میں مدد ملے گی۔ کمیشن نے سرمایہ کاروں کی مجموعی تعداد 25 لاکھ تک پہنچانے کا ہدف مقرر کیا ہے۔
چیئرمین ایس ای سی پی کبیر احمد سدھو کے مطابق نوجوانوں کو اسٹاک مارکیٹ میں شامل کرنا کمیشن کی اہم ترجیحات میں شامل ہے۔
جدید ڈیجیٹل سہولیات
انہوں نے کہا کہ جدید ڈیجیٹل سہولیات کے ذریعے نوجوانوں اور نئے سرمایہ کاروں کے لیے کیپٹل مارکیٹ تک رسائی آسان بنائی جا سکتی ہے۔
ایس ای سی پی کے مطابق نیا ڈیجیٹل آن بورڈنگ فریم ورک سرمایہ کاروں کے تجربے کو بہتر بنانے، اکاؤنٹ کھولنے کے عمل کو تیز کرنے اور ملک میں سرمایہ کاری کے کلچر کو فروغ دینے کی جانب اہم قدم ہے۔
