اسلام آباد (اردو رپورٹ)
ازبکستان کا 35واں یومِ آزادی اسلام آباد میں ایک پروقار تقریب کے دوران منایا گیا، جس میں سفارت کاروں، ارکانِ پارلیمنٹ اور دیگر نمایاں شخصیات نے شرکت کی۔
وفاقی وزیر توانائی سردار اویس احمد خان لغاری تقریب کے مہمانِ خصوصی تھے، جبکہ ازبک سفارتی مشن نے اس موقع پر ازبکستان کے تاریخی سفر، حالیہ اصلاحات اور پاکستان کے ساتھ بڑھتے ہوئے تعلقات کو اجاگر کیا۔
تقریب سے خطاب کرتے ہوئے ازبکستان کے سفیر علی شیر تختایف نے کہا کہ بطور ریاست ازبکستان کی جڑیں 3 ہزار سال سے زیادہ پرانی ہیں اور اس خطے نے الخوارزمی، البیرونی، ابنِ سینا، مرزا الغ بیگ اور علی شیر نوائی جیسے عظیم علما اور مفکرین پیدا کیے۔
انہوں نے کہا کہ صدر شوکت مرزیایوف کی قیادت میں ازبکستان نے وسیع پیمانے پر اصلاحات متعارف کرائی ہیں، جن کا مقصد عوام کے معیارِ زندگی، تعلیم، سائنس، جدت اور قانون کی حکمرانی کو بہتر بنانا ہے۔ سفیر کے مطابق ملک میں غربت میں نمایاں کمی آئی ہے جبکہ اسکولوں، جامعات اور سائنسی اداروں میں سرمایہ کاری میں بھی اضافہ ہوا ہے۔
ازبک سفیر نے وسطی ایشیائی ہمسایہ ممالک کے ساتھ تعلقات مضبوط بنانے اور عالمی سطح پر ازبکستان کے بڑھتے ہوئے روابط کو بھی اجاگر کیا۔
پاکستان اور ازبکستان کے تعلقات
پاکستان اور ازبکستان کے تعلقات کے حوالے سے علی شیر تختایف نے کہا کہ دونوں ممالک گہرے تاریخی، ثقافتی اور مذہبی روابط رکھتے ہیں، جبکہ حالیہ اعلیٰ سطحی دوروں نے دوطرفہ تعلقات کو نئی رفتار دی ہے۔
انہوں نے وزیراعظم شہباز شریف کے ازبکستان کے دورے اور صدر شوکت مرزیایوف کے فروری 2026 میں پاکستان کے سرکاری دورے کا ذکر کرتے ہوئے کہا کہ ان دوروں کے نتیجے میں 30 دوطرفہ دستاویزات پر دستخط ہوئے اور دونوں ممالک کی اسٹریٹجک شراکت داری مزید مضبوط ہوئی۔
پاکستان ازبکستان کی باہمی تجارت
سفیر نے کہا کہ دونوں ممالک آئندہ پانچ سال میں دوطرفہ تجارت کو 2 ارب ڈالر تک پہنچانے کا ہدف رکھتے ہیں۔ اس مقصد کے لیے سرمایہ کاری میں اضافے، تجارتی مراکز کے قیام، بینکاری روابط مضبوط بنانے اور اشیا کی نقل و حرکت میں سہولت پیدا کرنے کے لیے اقدامات کیے جا رہے ہیں۔
انہوں نے دونوں ممالک کے درمیان فضائی رابطوں میں اضافے کو بھی اہم پیش رفت قرار دیا اور کہا کہ تاشقند سے اسلام آباد اور لاہور کے لیے براہِ راست مسافر پروازیں پہلے ہی فعال ہیں، جبکہ کارگو روابط بھی قائم کیے جا چکے ہیں۔ کراچی کے ساتھ فضائی رابطہ بھی متوقع ہے، جبکہ اکتوبر تک ہفتہ وار پروازوں کی تعداد 9 تک پہنچنے کی توقع ہے۔
ازبک سفیر نے ازبکستان، افغانستان اور پاکستان کے درمیان ریلوے منصوبے کو وسطی اور جنوبی ایشیا کے درمیان ایک اہم ممکنہ رابطہ قرار دیا۔ ان کا کہنا تھا کہ یہ منصوبہ نئی منڈیوں تک رسائی، روزگار کے مواقع پیدا کرنے اور علاقائی تجارت و رابطوں کے فروغ میں اہم کردار ادا کر سکتا ہے۔
پاکستان کی جانب سے تعلقات مزید مستحکم کرنے پر زور
تقریب کے مہمانِ خصوصی وفاقی وزیر توانائی سردار اویس احمد خان لغاری نے کہا کہ پاکستان ازبکستان کے ساتھ اپنے تعلقات کو انتہائی اہمیت دیتا ہے۔
انہوں نے کہا کہ دونوں ممالک توانائی، تجارت، سرمایہ کاری اور علاقائی رابطوں سمیت مختلف شعبوں میں تعاون کو مزید وسعت دے سکتے ہیں، جبکہ مضبوط ٹرانسپورٹ روابط دونوں معیشتوں کے لیے نئے مواقع پیدا کر سکتے ہیں۔
اویس لغاری نے پاکستان اور ازبکستان کے عوام اور اداروں کے درمیان روابط مزید بڑھانے کی اہمیت پر بھی زور دیا۔ انہوں نے کہا کہ بہتر رابطہ کاری اور اقتصادی تعاون دونوں ممالک کی دیرینہ دوستی کو ایک مضبوط شراکت داری میں تبدیل کرنے میں مدد دے سکتے ہیں، جس کے دونوں ملکوں کے عوام کو عملی فوائد حاصل ہوں گے۔
ازبکستان کا ثقافتی ورثہ
تقریب کا اختتام ازبک کھانوں اور ایک ثقافتی پروگرام کے ساتھ ہوا، جس میں ازبکستان کے بھرپور ثقافتی ورثے کو اجاگر کیا گیا۔
دونوں جانب سے اس اعتماد کا اظہار کیا گیا کہ اقتصادی تعاون، رابطہ کاری اور ثقافتی تبادلوں میں اضافے کے ذریعے پاکستان اور ازبکستان کی دیرینہ دوستی مزید مضبوط ہوتی رہے گی۔
ازبکستان کی آزادی کی 35ویں سالگرہ کے سلسلے میں اسلام آباد میں منعقد ہونے والی اس تقریب میں ’’ازبکستان، پاکستان: دوستی اور بھائی چارے کی دھنیں‘‘ بحِ بجائِ گئِن جبکہ روایتی ازبک موسیقی اور رقص کی بھی شاندار پرفارمنس پیش کی گئی۔
تقریب میں ممتاز ازبک فنکاروں نے موسیقی اور روایتی رقص کے ذریعے اپنے ملک کے بھرپور ثقافتی ورثے اور فنکارانہ روایات کو اجاگر کیا۔
رنگا رنگ ملبوسات، دلکش موسیقی اور خوبصورت روایتی رقص نے حاضرین کو محظوظ کیا اور انہیں ازبکستان کی متنوع ثقافتی روایات کی جھلک دیکھنے کا موقع فراہم کیا۔
حاضرین نے پرفارنس کو سراہا اور داد دیتے ہوئے کہا کہ ایسے لگتا ہے جیسے ہم سمر قند بخارا میں ہوں،رقاصوں نے سب کو مسحور کیا "کسنے ہا کہ ملبوسات شاندار تھے اور فنکاروں کی مہارت بھی اعلیٰ درجے کی تھی۔‘‘جبکہ کسے نے اس کو ازبک ثقافت اور تمدن کے حوالے سے ایک دلکش شام سے تعبیر کیا
پاکستان میں ازبکستان کے ثقافتی دنوں کا اعلان
سفیر علی شیر تختایف نے ایک روز قبل ازبکستان ٹوارزم روڈ شو میں یہ اعلان کیا تحا کہ رواں سال کے آخر میں پاکستان میں ’’ازبکستان کے ثقافتی دنوں‘‘ کے انعقاد کی تیاریاں جاری ہیں۔
انہوں نے بتایا کہ اس موقع پر ایک بڑا ازبک ثقافتی وفد پاکستان آئے گا، جو ازبکستان کے تاریخی ورثے، روایتی فنون اور عصرِ حاضر کی ثقافتی کامیابیوں کو پاکستانی عوام کے سامنے پیش کرے گا۔
متعلقہ خبریں
Shehbaz Sharif, Uzbekistan President Pledge $2bn Trade Target – urdureport.com
پاکستان اور ازبکستان کا پانچ سالہ تجارتی روڑ میپ،نیشنل بینک کی برانچ کا قیام – urdureport.com
