اردو رپورٹ ڈیسک
اسلام آباد ہائیکورٹ نے تحریک انصاف کے 27 ستمبر احتجاج کیس کا فیصلہ محفوظ کرلیا ہے۔ کیس میں تمام صوبوں کے ایڈووکیٹ جنرلز سمیت ایڈووکیٹ جنرل اسلام آباد کے دلائل بھی مکمل ہوگئے۔
عدالت میں سرکاری وسائل اور مشینری کے استعمال سے متعلق مؤقف بھی پیش کیا گیا، جبکہ خیبرپختونخوا کے چیف سیکرٹری اور انسپکٹر جنرل پولیس نے اپنے بیاناتِ حلفی بھی جمع کرا دیے۔
احتجاج کے مقاصد پر سرکاری مؤقف
ایڈووکیٹ جنرل اسلام آباد نوید حیات ملک نے دلائل دیتے ہوئے کہا کہ مجوزہ لانگ مارچ کے اب تک دو مقاصد سامنے آئے ہیں۔ ان میں ایک سزا یافتہ قیدی کی رہائی اور دوسرا حکومت گرانا ہے، جبکہ دونوں مقاصد غیرقانونی ہیں۔
ایڈووکیٹ جنرل اسلام آباد کی درخواست پر کمرۂ عدالت میں تحریک انصاف کے 2020 اور 2024 کے احتجاج کے دوران جلاؤ گھیراؤ کی ویڈیوز بھی چلائی گئیں۔
سیکیورٹی اور انتظامات سے متعلق خدشات
نوید حیات ملک نے عدالت کو بتایا کہ تحریک انصاف مکمل وسائل کے ساتھ اسلام آباد آنا چاہتی ہے، جبکہ حکومت کے پاس انہیں روکنے کی صلاحیت نہیں ہے۔ ان کے مطابق انتظامیہ صرف سیکیورٹی انتظامات کرسکتی ہے اور دفعہ 144 نافذ کرسکتی ہے۔
انہوں نے کہا کہ حکومت اپنے شہریوں پر گولیاں نہیں چلاسکتی اور نہ ہی ان کی جانیں لے سکتی ہے۔ ایڈووکیٹ جنرل نے مؤقف اختیار کیا کہ پانی سر سے گزرنے سے پہلے پیشگی اقدامات کرنا ہوں گے۔
پارلیمنٹ میں عدم اعتماد کی تحریک لانے کا مشورہ
ایڈووکیٹ جنرل اسلام آباد نے کہا کہ اگر کسی کو وزیراعظم سے ناخوشی ہے تو اسے پارلیمنٹ میں عدم اعتماد کی تحریک لانی چاہیے۔ ان کا کہنا تھا کہ اگر چوک چوراہوں پر حکومت گرانے کی کوشش کی جائے گی تو پھر قانون کی حکمرانی کی بات نہیں کرنی چاہیے۔
انہوں نے مزید کہا کہ عدالتوں میں مقدمات پہلے سے زیادہ دائر کیے جارہے ہیں، جس کا مطلب ہے کہ عوام کا عدلیہ پر اعتماد بڑھ رہا ہے۔
