چین کی عالمی شہرت یافتہ الیکٹرک گاڑیوں کی کمپنی BYD نے پاکستان میں اپنی موجودگی کو وسعت دیتے ہوئے کراچی کے قریب کار اسمبلی پلانٹ اور سندھ کے علاقے غارو میں جدید NEV پروڈکشن زون قائم کرنے کا اعلان کیا ہے۔ یہ منصوبہ پاکستان میں الیکٹرک وہیکل (EV) انڈسٹری کی ترقی کی جانب ایک اہم پیش رفت قرار دیا جا رہا ہے۔
غیر ملکی خبر رساں ادارے کے مطابق BYD نے اعلان کیا ہے کہ وہ پاکستان میں اپنی پہلی اسمبل شدہ گاڑی 2026 کے وسط تک مارکیٹ میں لانے کا ارادہ رکھتی ہے، جبکہ کراچی کے قریب قائم ہونے والا پلانٹ ابتدائی طور پر مقامی مارکیٹ کی ضروریات کو پورا کرے گا۔
اسی منصوبے کے تحت سندھ کے علاقے غارو میں 73.4 ایکڑ پر مشتمل BYD NEV پروڈکشن زون بھی تیار کیا جا رہا ہے، جسے جدید صنعتی اسپیشل ٹیکنالوجی زون (STZ) کے طور پر ڈیزائن کیا گیا ہے۔ اس زون میں الیکٹرک گاڑیوں کی اسمبلنگ، ٹیسٹنگ، تربیتی سہولیات اور اسمارٹ فیکٹری سسٹمز شامل ہوں گے، جو پاکستان میں جدید آٹو مینوفیکچرنگ کے نئے دور کی بنیاد رکھ سکتا ہے۔
پاکستان میں گاڑیوں کی پیداوار
کمپنی اور مقامی پارٹنر میگا موٹر کمپنی، جو ہب پاور (Hubco) کی ذیلی کمپنی ہے، کے اشتراک سے یہ پلانٹ اپریل سے زیرِ تعمیر ہے۔ ابتدائی طور پر اس کی سالانہ پیداواری صلاحیت تقریباً 25 ہزار گاڑیاں (دو شفٹوں میں) ہوگی، جہاں درآمد شدہ پرزوں کی اسمبلنگ کے ساتھ کچھ غیر برقی اجزاء کی مقامی تیاری بھی کی جائے گی۔
مذید خبریں
فراری نئی سپر کار ،2.5 سیکنڈ میں 0 سے 96 کلومیٹر فی گھنٹہ کی رفتار – urdureport.com
BYD پاکستان کے عہدیداروں کے مطابق یہ پلانٹ 2026 میں مکمل طور پر آپریشنل ہونے کی توقع ہے، تاہم مکمل پیداواری صلاحیت تک پہنچنے کا ٹائم فریم ابھی واضح نہیں کیا گیا۔ مستقبل میں کمپنی خطے کے دائیں اسٹیئرنگ (Right-hand drive) ممالک کو برآمدات کا بھی جائزہ لے رہی ہے۔
کمپنی کا موقف
BYD کے ایشیا پیسیفک جنرل منیجر لیو ژویلیانگ نے کہا کہ پاکستان میں انٹری صرف جدید گاڑیاں فراہم کرنے تک محدود نہیں بلکہ اس کا مقصد ماحول دوست ٹیکنالوجی اور جدید صنعتی نظام کو فروغ دینا بھی ہے۔
کمپنی کراچی، لاہور اور اسلام آباد میں تین فلیگ شپ اسٹورز اور ایکسپیرینس سینٹرز بھی قائم کرے گی، جبکہ ابتدائی مرحلے میں دو SUV ماڈلز اور ایک سیڈان کی فروخت متوقع ہے۔
نئی انرجی وہیکل انڈسٹری
ہب پاور کے سی ای او کامران کمال کے مطابق یہ سرمایہ کاری پاکستان میں نئی انرجی وہیکل انڈسٹری کے لیے ایک “اہم سنگ میل” ہے، جبکہ کمپنی ملک میں فاسٹ چارجنگ اسٹیشنز کا نیٹ ورک بھی قائم کرنے کا ارادہ رکھتی ہے تاکہ الیکٹرک گاڑیوں کے لیے بنیادی انفراسٹرکچر کو بہتر بنایا جا سکے۔
ماہرین کے مطابق BYD کا یہ منصوبہ پاکستان کی آٹو انڈسٹری، بیٹری ٹیکنالوجی اور گرین انرجی سیکٹر میں ایک بڑی تبدیلی کا پیش خیمہ ثابت ہو سکتا ہے، تاہم اس کی کامیابی کا انحصار چارجنگ انفراسٹرکچر اور مارکیٹ کی قبولیت پر ہوگا۔
